لست فقط حبيبي بقلم نونة
نور : كفاية يارءوف…..
انت عاوز ايه علشان ترتاح؟؟؟؟
رءوف : ارتاح!!!!!
الكلمة دى مابقتشى لايقة عليا
نور : انت اللى خلتها كده
رءوف : انا ؟ اه صح انا انا اللى
نور : قبل ماتقولها تانى….
انت مصدقها بجد ؟
رءوف : انا مش مصدقها انا شفتها
نور : لاانا بسالك انت مصدقها ؟
مش كل اللى عنينا بتشوفه بيكون صح
عنينا ممكن تخدعنا
وعقلنا كمان
لكن قلبنا عمره مايخدعنا ابدا
انت مصدق اللى انت كنت عاوز تقوله ؟
رءوف : انا شفته
نور : ماانت يااما شفت حجات كتير اشمعنى ده بس اللى فاكره
رءوف : حاجات كتير ؟
نور : اه…
شفتنى دلوقتى زى ماكنت بتشوفنى كل يوم زمان وانا بادى فرض ربنا وكنت انت زمان إمامي …….
شفتنى وانا بكبر قدامك يوم بعد يوم لدرجة انى كنت ببقى معاكم اكتر ماكنت مع بابا الله يرحمه…..
شفت الاستاذ توفيق الله يرحمه وعرفته وحبيته وكنت بتقوله بابا توفيق من كتر حبك واعجابك بيه وبشخصيته……
شفتنى وانا بنتك وحبيبتك وخطيبتك ومراتك وام ابنك لحد مابقى عمرى 22 سنة قدامك كلهم لحظة بلحظة مروا…..
شفتنى بحب ايه وبكره ايه وشفت قد ايه عمرى ماكدبت ولا خالفت وعد ولاغدرت بحد ولاجرحت حد ولا ازيت حتى طير او حيوان……
شفتنى واحنا بنقرى ونحفظ كتاب ربنا سوا من واحنا فى الحضانة وانت اللى كنت بتحفظنى وبابا يسمعلنا……
شفت كل ده وفى لحظة نسيته علشان شفت موقف واحد…..
كل ده فجاة مابقاش فى بالك ولا فى عقلك ولا ليه اى اعتبار ولا اى قيمة….
صدقت انى خونتك فى لحظة علشان شفت حد غريب فى بيتك وانت مسافر……
طب مافكرتش فى يوم انا ليه خونتك؟
بكرهك ؟ مش عاوزة اعيش معاك ؟ بسيطة ليه مااطلقتش منك؟ ليه حبى ليك ماقلش ولا اتغيرت معاك ؟ مع انك انت اللى كنت متغير ومع ذلك عمرى مااتغيرت ولامليت ولازهقت ولاتعبت منك….
طب يمكن انا انسانة قذرة زى ماانت قولت وبخون لانى كده مش لانى بحب غيرك وعاوزاه
يمكن ليه لا مافى ستات كتير كده ربنا يهديهم …. لكن نور منهم؟
لو كانت كده وانت طول عمرك كنت بتقول عليها الملايكة مخلوقة من نور وانتى يانور النور والملاك بتاعى
يبقى انا قذرة بنت الاستاذ توفيق واللى كانت بتصحيك تادى فرض ربنا معاها وتحفظ معاك كتابه…. قذرة
لا تصدق لايقة على بعضها ؟
كل ده انت شفته وعشته وعملته بايديك وفى لحظة كدبته ومافكرتش فيه وفكرت بس فى واحد شفته…..
