لست فقط حبيبي
الجزء الثامن عشر
في صباح اليوم يذهب فاروق للاطمئنان على رءوف ولكنه لايجد احد بغرفة باسم فيذهب للبحث عنهم……..
فاروق : امال فين رءوف ؟
باسم : فى اوضتى فوق ياجدى
فاروق : لا مش فوق انا لسه كنت فى اوضتك مافيهاش حد
باسم : انا سايبه من شوية ….
حسيته انه محتاج يقعد لوحده شوية فسبته….
فاروق : شوفه راح فين وشوف نور كمان
باسم : حالا ياجدى
يعود باسم بعد دقائق…..
باسم : رءوف مش فى الفيلا خالص ونور نايمة مع احمد فى اوضتها
فاروق : يبقى مشى ..
اوك ابقى اتصل بيه اطمن عليه
باسم : وبعدين ياجدى ؟ انا نفسى تعبت من الوضع ده
انت ماشفتش حالة الاتنين كانت عاملة ازاى امبارح
انا هحكيلك اللى حصل
فاروق : وماتعرفشى ايه اللى دار بينهم؟
باسم : لا..
بس واضح ان الوضع مابقاش بيحتمل التاخير اكتر من كده
فاروق : بدات احس انى كنت غلطان لما خليتك تجيبه حفلة الخطوبة
ماكنتش متصور انه لسه بيحب نور فعلا …..
باسم : انا دمى بقى بيغلى ياجدى نفسى اعرف مين عمل كده انا لو عرفته هقتله هقطعه مليون حتة ابن الحرام ده….
فاروق : مش هو بس المسئول..
اللى خلى الوضع يوصل للمرحلة دى هو اللى لغى عقله وصدق لعبة حقيرة ….
باسم : قصدك رءوف ياجدى ؟!!!!
اى واحد مكانه هيعمل ايه يعنى ؟
فاروق : يشغل عقله حتى لو كدب عنيه
باسم : علشان احنا عارفين الحقيقة ممكن نقول كده لكن لو انت فى نفس الوضع مش هتقول كده ياجدى…
فاروق : مافيش فايدة من الكلام معاكم لما تبقى قدى هتعرف ان العيب الوحيد للشباب هو الطيش والانفعال اللى بيغطى على عقولهم فى بعض الاوقات….
باسم : يمكن بس المهم ازاى نوصل؟
فاروق : لو هديت هتعرف تفكر كويس ..
صفى زهنك وفكر بعقلك بعيد عن الانفعال وانت تلاقى الطريق قدامك
باسم : طريق ايه؟… ماتشاورلى عليه بس
فاروق : لازم تلاقيه انت ..
مش يمكن لو فكرت تلاقى طريق اوضح واحسن ..
ماتحبطشى عقلك وقدراته وتعتمد على غيرك…
باسم : ماشى ياجدى انا هطلع احاول انام شوية علشان ابقى اعرف اصفى زهنى زى ماقولتلى لانى مانمتش من امبارح خالص…
………………………………………….. ………………………………………….. ….
فى المجموعة………..
عصام :ايه التخاريف اللى قدامى دى ؟ ازاى المشروع ده دخل التخطيط
اميرة : نور مضت بالموافقة وبعتتهولى اعمله التصميمات وادينى خلصتها …اكتر من كده مااعرفشى
عصام : الصفا ؟ بتوقيع رئيس مجلس ادارتها رءوف
اميرة : اه بالظبط كده …. انت عندك معلومات عن المشروع ده ؟
عصام : سيبى الورق ده هنا وروحى انتى شوفى شغلك
اميرة: ماشى اهوه ….باى
تخرج اميرة تاركة عصام يمسك باوراق المشروع لايقرا منها شيئا ولكنه فقط يتامل توقيعات موقعيها……
عصام : ده انت ليك خاطر كبير اوى ياسى رءوف بس ياترى من امتى وليه ؟ وايه اللى بيجمع بينك وبينها ؟ …………
يدخل عليه فؤاد ……..
فؤاد : صباح الخير ياعصام
عصام : صباح النور يابابا
فؤاد : كويس انا كنت جايلك بخصوص اللى فى ايديك ده مش ده بردوا مشروع القرية السياحية
عصام : اه هو بالظبط …خير ؟
فؤاد : لو كنت قريته هتشوفه انه كارثة مش خير
المشروع ده لو كمل انا مش هستمر فى المجموعة دى يوم واحد بعد كده ولاهيبقى ليا ولا ليك انت كمان اى كلمة ولا اعتبار هنا
ازاى مشروع زى ده يتمضى فى حين انى كنت فى مفاوضات على مشروع بنفس المواصفات وباقل تكلفة وماكنتش موافق ان نسبتنا تكون خمسسين فى المية وكنت خلاص قربت اتوصل لاتفاق ان يكون لينا احنا 51 فى المية والادارة كاملة الاقى فى يوم وليلة مشروع زى ده اتمضى يبقى انا شكلى ايه قدام الناس…..
عصام : طب اهدى بس حضرتك واللى عاوزه هيكون
فؤاد : المشروع ده لازم يتلغى
عصام : ازاى بعد مااتمضى وفيه شرط جزائى كبير
فؤاد : اتصرف….
عصام : هتصرف يابابا….
ماتقلقشى ….
هيتلغى ..
………………………………………….. ………………………………………….. ……………………….
فى فيلا فاروق ….
يستيقظ احمد ليجد نفسه فى مكان غريب ولكنه عندما ينظر بجانبه ويجد نور يطمئن ويمد يده ليقظها…..
نور : احمد انت صحيت ياحبيبى …..صباح الورود
احمد : فين بابى ؟
نور : بابى هنا ياحبيبى …
تعالى بس نغسل وشنا علشان تبقى زى القمر وتفوق كده وبعدين هخليك تروحله…
احمد : ماسى
تاخذ نور ابنها ولاول مرة منذ ان كان عمره ستة اشهر فقط تستيقظ وتراه فعلا امام عينيها وليس خيال …
وهى من يقوم بغسل يديه ووجهه .. كم كانت تحتاج لكل تلك الاشياء البسيطة والتى تقوم بها كل ام يوميا ولكن هل ستكون المرة الاولى والاخيرة ام لا؟؟؟؟؟
تخرج نور من غرفتها وتذهب لغرفة باسم تطرق الباب وتدخل لتجد باسم فقط نائما فى سريره…….
نور : باسم باسم
باسم : اييييييه …
نور…. صباح الخير
نور : صباح النور فين رءوف ؟
باسم : مش عارف انا الصبح دورت عليه لقيته خرج
نور : طب بابى شكله راح الشغل ياحبيبى تيجى بقى نفطر دلوقتى ونستناه لحد مايخلص
احمد : لا انا عاوز اشوف بابى ويبدا فى البكاء
نور : علشان خاطرى ماتعيطش مش انت بتحب نور وحياتى مش تعيط ووالله بابى بقى كويس وراح الشغل كمان ولما يرجع زى كل يوم هتشوفه كمان….
باسم : ايه يااحمد باشا ..
بقى فى باشا يعيط على الصبح كده لالالالالالالالالالالالالالا شكلك لابااشا ولاحاجة ولسه عيل صغير
نور : بقى احمد عيل …عاجبك اللى بيقوله ده مش انت اكبر منه
احمد : اه
باسم : خلاص ورينى انا هنزل الحق الفطار وهاكله كله لوحدى لو راجل بجد اسبقنى لحد تحت….
يجرى باسم فيجرى خلفه احمد وتتبعهم نور وهى تبتسم لنجاح باسم فى التعامل مع احمد ..
ولكن بالها منشغل على رءوف ياترى اين ذهب وماذا سيكون رد فعل مادار بينهم بالامس ؟؟؟؟؟
………………………………………….. ………………………………………….. …………………….
فى شركة الصفا…………
مهاب : هى دى اللى بيقولوا عليها كاملة الاوصاف بجد .. مال وجمال ومافيهاش غلطة…..
سمير ( صديق لمهاب ويعمل موظف فى الشركة ومن شلة مهاب ) : طب وهى واحدة زى دى ايه هيخليها تبصلك انت
مهاب : ليه وانا ناقصنى ايه بقى ان شاء الله
سمير : ماتزعلشى منى ياصاحبى انت بتقول مال وجمال يعنى الف مين يتمناها ولما تيجى تفكر فى حد مش هتفكر فى مجرد موظف حتى لو كان مدير شركة مش مدير تنفيذى بس …
ولو هى فكرت اهلها هيرضوا اكيد هيدوروا على الاصل والفصل والفلوس…..
مهاب : الكلام ده كان زمان دلوقتى المهم الحب
سمير : حب ايه ياصاحبى انت هتضحك عليا انت عاوز الفلوس وبس
مهاب : مابتكلمشى عليا ..
انا اقصدها هى …لو قدرت اخليها تحبنى تبقى المسالة منتهية
سمير : لا مش هتكون منتهية لسه فى فاروق المصرى وفؤاد بيه ابنه انا اسمع عنه انه مابيملاش عينه حاجة والا هتجوزها من غير رضاهم فيدوهالك من غير ولامليم
مهاب : تصدق معاك حق ..
طب والحل
سمير : مافيش غير حاجة من اتنين…
ياما تبقى على الاقل قريب من مستواهم يعنى تفتحلك شركة صغيرة كده اهوه يبقى اسمك من رجال الاعمال ومايقولوش طمعان فيهم ..
يااما بقى تنسى الموضوع ده وماتتعبشى نفسك فيه
مهاب : شركة ؟ ومنين بقى ان شاء الله
سمير : ياراجل بقى انت بردوا اللى بتقول منين
مهاب : وحياتك انت كل اللى عندى مايعملشى حاجة
سمير : خلاص بقى ارضى بنصيبك ياصحبى
مهاب : واشمعنى انا يعنى اللى ارضى بنصيبى وغيرى جاتله بيضة مقشرة وبقى صاحب شركة لا وايه ده انا اللى مقشرهاله.. وفى الاخر اخد القشر وهو يلهف البيضة كلها
سمير : تقصد ايه ؟
مهاب : ها ؟
لاوالاحاجة دى حكاية واحد صاحبى كده فكرتنى انت بيها..
سيبك انت انا هلاقيلها حل …..لازم الاقيلها حل
سمير : ماشى بس لما تلقالها حل ماتبقاش تنسانا ياصحبى
مهاب : عيييييب انا ليا غيرك….
………………………………………….. ………………………………………….. …………………..
فى حديقة فيلا فاروق تلعب نور وباسم واحمد الذى فرح جدا بوجوده مع نور وباسم ولاتستطيع ان تفرق اين من الثلاثة الطفل وأيهم الكبير…
ويجلس فاروق يتابعهم بسعادة شديدة وهو يرى اطفاله الثلاثة يمرحون ويلعبون…..
باسم : مش عربية صافى دى ؟
تنظر نور الى بوابة الفيلا لترى سيارة صافى وهى تدخل وبعد قليل تنزل منها صافى فتغيب البسمة عن وجهه الجميع واولهم الصغير الذى لايفرح بقدومها ويقف بجانب نور كمن يحتمى بها من شبح يخيفه …….
باسم : يااهلا ايه النور اللى دخل علينا ده
صافى : ههههه ميرسى
نور : اهلا وسهلا اتفضلى ياصافى
صافى : انا شكلى جيت قطعت عليكم لعبكم
نور : لا ابدا ممكن تلعبى معانا لو عاوزة
صافى : ههههههههه لا انا كبرت على اللعب ده من زمان
باسم : انا عارف مزاج صافى كويس..
بتحب لعب من نوع تانى خالص
صافى : قصدك ايه بقى ياسى باسم ؟
باسم : قصدى ان لعب العيال ده مش مزاجك وان مزاجك لعب الكبار الكبار اوى
صافى : ولو انى مش فهماك ومش مريحنى كلامك بس اكيد لعب الكبار احلى…..
نور : دى وجهات نظر…..
باسم : احنا هنفضل واقفين نتكلم كده على الواقف اتفضل ياقمر
صافى : ميرسى… انا بس كنت جاية اطمن على رءوف واحمد
باسم : هو ماروحشى ؟
صافى : روح فين ؟ هو مش بات هنا امبارح….
باسم : اه لكن الصبح صحيت مالقتوش فى الفيلا افتكرته مشى وراح على بيته يرتاح فيه
صافى : لا ماجاش يمكن بقى راح الشركة
باسم : وهو تعبان كده ؟
صافى : زمانه بقى زى الحصان هو رءوف كده ماتشغلش بالك انت عليه……
طب انا ممكن اروح بقى انا واحمد وكفاية تعبكم ده لحد دلوقتى
يتمسك احمد بثياب نور
احمد : لاانا مس عاوز اروح انا هستنى بابى
صافى : بابى هيرجع على البيت مش على هنا يالا وابقى استناه هناك
احمد : ماليس دعوة انا مس عايز اروح
صافى : ولد اسمع الكلام والا هخليك تسمعه بالعافية
نور : بالعافية ؟
يمسك باسم بيد نور فى اشارة منه ليمنعها عن االكلام والسيطرة على انفعالها …..
باسم : وليه بالعافية وتتعبى نفسك ماتسبيه هنا معانا شوية وباباه يبقى يجى ياخده او انا بنفسى هبقى اوصله شكلك مش فاضية واكيد وراكى مشاوير وحجات اهم……
صافى : بس ماينفعشى ياباسم
باسم : ولو قولتلك علشان خاطرى اما اشوف بقى ليا خاطر عندك والا لا……
صافى : امممم اوكى انت حر انتوا اللى غاويين وجع دماغ وبصراحة انا فعلا ورايا مشوار مهم وكنت هتاخر عليه علشان اروحه
باسم : مااتحرمش منك ياجميل كنت متاكد ان خاطرى كبير اوى عندك….
صافى : من زمان بس انت اللى ماكنتش واخد بالك
باسم : مش مهم زمان المهم انى خدت دلوقتى
صافى : عندك حق المهم اللى جاى …
طب اسيبكم انا بقى عن اذنكم…..
باسم : مع الف سلامة ياجميل خلى بالك على نفسك
صافى : اوكى باى
باسم : باى
تنصرف صافى تاركة احمد …………….
باسم : اى خدمة ياعم تعالى بقى اما اقطعك ماتش كورة
احمد : انا اللى هقطعك
باسم : هههههههههه بقى كده ده انا لسه مخلصك من بق الاسد..
انا غلطان….
ياصافىىىىىى تعالى خدى احمد….
احمد : لألألألألأ ياعمو
نور : هههههههه ماتخضهوش ياباسم وبعدين هو اللى هيغلبك ويقطعك كمان براحته
باسم : اه ماهو من لقى احبابه ..
تصدقوا انا غلطان انى بعرف اندال زيكوا ..
وانا اقول الواد طالع لمين..
ماشى ياستى اتفضل ياسى ميدو قطعنى انا تحت امر معاليك
نور : ههههههههههه
فاروق : بسم الله ماشاء الله الشمس نورها زيادة النهارده والجميل بيضحك كده….
نور : باسم خلى صافى تسيب احمد معانا شوية كمان …
فاروق : ان شاء الله قريب هيكون هنا على طول
نور : تفتكر ممكن ياجدى؟؟؟؟
فاروق : اكيد ممكن بس تعالى نتكلم شوية فى المكتب
نور : تحت امرك ياجدى…
فى تلك الاثناء يدخل عصام ويلحق بنور قبل ان تدخل مع جدها مكتبه…..
عصام : لو سمحتى عاوزك حالا
نور : فى ايه ياعصام مالك داخل مش طبيعى ؟
عصام : ليه ؟مجنون ؟
اللى مش طبيعى هو اكيد حضرتك اللى يمضى على عقد بالمنظر ده يبقى يامش طبيعى ياعاوز يخسرنا متعمد ممكن اعرف بقى انتى انهى فيهم؟؟
نور : انت ازاى بتتكلم معايا بالطريقة دى انا مااسمحلكش تكلمنى كده..
لما تبقى تعرف ازاى تكلمنى ابقى ارد عليك عن اذنك….
عصام : اوقفى هنا واتكلمى كويس زى مابكلمك
فاروق : عصام
انت نسيت انى موجود والا ايه ؟ ماتضربها قدامى احسن ؟ ازاى صوتك يعلى فى وجودى
عصام : انا اسف ياجدى ماقصدتش
بس اتفضل حضرتك شوف اللى الهانم عملاه ومابقالهاش كتير فى المجموعة….
فاروق : اللى عاوز يعرف حاجة الاول يتكلم بادب ويسال وبعدين لما مايلاقيش رد لاسالته يبقى يتعفرت براحته
عصام : طب ممكن بقى اعرف ايه ده ولمصلحة مين ؟
فاروق : انا اللى امرت نور انها تمضى العقد ده عندك اعتراض ؟
عصام : انت ياجدى !!!!!!!!
فاروق : ايوه انا عند حضرتك اعتراض ..
والا هتعلمنى ازاى امشى شغلى ..
والا فاكر طالماوزعت عليهم كل حاجة يبقى ماليش كلمة هنا..
انا عملت كده علشان بس لما اموت ماتختلفوش لكن طول ماانا عايش ماحدش ليه التصرف فى اى حاجة الا بامرى من اكبر لاصغر واحد فيكم….. انت فاهم ؟
عصام : طب ممكن افهم بقى ازاى مشروع زى ده يتوافق عليه وفى المقابل مشروع زيه واحسن وبارباح وبنسبة اكبر ويترفض؟؟؟؟
فاروق : لما تبقى تهدى وتعرف تتكلم كويس ابقى تعالالى المكتب وانا افهمك ..
ده لو عاوز تفهم وبطلت عصبيتك ومخك اللى لابيسمع ولابيشوف حد ده….
ودلوقتى امشى من قدامى مش عاوز اشوفك الا لما ترجع لعقلك وتفوق من اندفاعك وتهورك ده..
اتفضل ……..
ينصرف عصام كاتما غيظه ويترك البيت باكمله…….
