ظنها دمية بين يديه بقلم سهام صادق

– أول حاجه لازم تفهميها يا بنتِ إن التصنت من أسوء العادات، فأتمنى ده ميتكررش تاني ومش محتاجة خلاص أقولك البيه أمر ب إيه، هو رأف بحالتك زي ما أنا توسمت فيكي خير

ابتلعت ليلى ريقها في حرج، تطالعه وهي تفرك يديها بتوتر
– مكنش قصدي أتصنت عليكم

تجاهل العم سعيد كلماتها يُحاول أن يجعلها تفهم شيئاً عليها ألا تنساه
– وجودك في البيت كوضع مؤقت لحد ما صاحبتك تخرج وتلاقوا مكان تعيشوا فيه

…….

دارت عينين الواقفة بفتيات الدار تنظر نحو أجسدهن ومفاتنهن، علقت عيناها بتلك الواقفة على مقربة منها تمضغ علكتها

– شكلي لقيت اللي عايزاه أخيراً لكن أنا محتاجة بنتين كمان، كان عندك حق يا صبري لما قولتلي ندور في الملجأ

– أهلاً يا مدام.. أنا استاذه كريمة مشرفة الدار

أسرعت الأخرى في مدّ كفها تنظر بنظرة أخيرة نحو صاحبة العينين التي علقت عيناها بها
– صديقه ليا لما قولتلها عايزه أعمل خير، رشحتلي الدار بتاعتكم

ارتسمت ابتسامة واسعة فوق شفتي السيدة كريمة ترحب بها بحفاوة
– أهلا وسهلا.. اتفضلي معايا في مكتبي
واردفت بتساؤل
– هتتبرعي بفلوس ولا بمستلزمات تفيد الدار

تأوه خافت خرج من شفتي السيدة الأنيقة بعدما اصطدمت بها زينب دون قصد
– أسفه يا هانم مكنش قصدي، اقول عليها إيه دودو العفريته بتجري مني مش عايزة تسرح شعرها

مسدت الأخرى كتفها تُحاول رسم ابتسامة فوق شفتيها وتنظر نحو زينب بنظرة فاحصة مدققة
حاولت السيدة كريمة التحكم في إخراج كلماتها الحازمة ببعض اللين

– خلاص يا زينب روحي شوفي دنيا وياريت تبطلوا دلع فيهم، أنتوا خلاص خارجين من الدار لكن هما لسا قدامهم عمر بحاله

اماءت زينب لها برأسها واسرعت في الإبتعاد تشعر بغصة في حلقها كلما تذكرت إنها ستترك هؤلاء الصغار

سارت السيدة كريمة نحو غرفة مكتبها تفتحها تنظر لهيئة من تتبعها تهمهم بخفوت
– هي الستات اللي زي ديه معندهومش وقت غير يقفوا قدام المراية
– معرفتنيش بنفسك يا مدام

تسألت السيدة كريمة بعدما جلست فوق مقعدها خلف مكتبها
– مشيرة النادي

……

تجمدت يد عزيز فوق الهاتف بعدما أستمع لصوت سيف يطلب منه المجئ إليه قسم الشرطة
– أنا معملتش حاجة يا عمي، أنا ماليش ذنب
حاول عزيز السيطرة على سرعة أنفاسه وقد انسحبت منه في ذعر
– سيف قولي أنت في أنهي قسم شرطة