رواية لست آثمة بقلم الكاتبة يسرا مسعد
جيهان: خير يا دكتور اتطمن انت بتشكك فى قدراتى الجراحيه ولا ايه؟
حازم: ابد ابدا يا دكتوره بالعكس انا متشكر جدا ليكى
جيهان: مين دى يا دكتور الممرضات دوروا فى لبسها عن اى حاجه عن بطاقه عن موبايل حتى مالقوش
حازم: معقول ولا حاجه خالص؟
جيهان: ابدا مافيش فى جيبها غير خمسين جنيه مجمده ومفتاح صغير
حازم: انا كنت سايق العربيه فجأه ظهرت من العدم ومقدرتش انى اتلافيها
جيهان: عامة هيا قدامها ساعه زمن وتفوق وساعتها هنعرف وممكن تكون واحده من اياهم ماتشغلش بالك
قامت جيهان من مجلسها وسالها الدكتور حازم : طيب النزيف كان مصدره ايه
جيهان: كانت حامل !!!!
حازم: كانت؟؟؟؟؟
جيهان: الحمل يبدو انه كان فى الشهر الاول وصدمه زى دى اجهضته طبعا ماهو عشان كده بقولك تلاقيها واحده من اياهم
حازم يهز رأسه بامتعاض لاويا شفتيه: ماشى يا دكتوره اتفضلى انتى مش هأخرك اكتر من كده وماتتعبيش روحك انا هبقى اعدى عليها كمان ساعه كده
جيهان: معقول يا دكتور المفروض تروح ترتاح
حازم: ماتشغليش بالك انا كنت ماشى تعبان جدا ومستعجل على النوم بأى شكل لكن من اللى حصل الليله دى خلانى افوق
الفصل الثانى
يتوجه حازم بعد ساعه لغرفه مريضته التى جاء بها من الظلمات وهو يفكر: طلعتلى منين وازاى ماشوفتهاش
يطرق الباب طرقا خفيفا ثم يدلف الى الغرفه ليجدها مازالت نائمه وقد ترك الحادث على وجهها اثارا وخدوشا بسيطه لم تنجح فى تعكير صفو جمالها الظاهر للعيان
يتأملها حازم بدقه فوجهها طفولى برىء يدها صغيره نظيفه اظافرها مقلمه بعنايه غير مطليه وجهها شاحب قليلا
فجأه فتحت عينيها الرماديتين وحركت رأسها قليلا انتبه حازم فى الحال وسألها: انتى كويسه؟ حمد لله على السلامه
ردت الفتاه: الله يسلمك
حازم: ايه اللى خلاكى ترمى نفسك تحت العربيه كده؟ كنتى عاوزه تنتحرى؟
الفتاه: لاء انا بس كنت ماشيه ومش عارفه انا رايحه فين وبجد اتفاجئت بالعربيه وكنت متخيله انى هوقفها
حازم: معقول توقفيه؟ انتى اسمك ايه؟
الفتاه:سيرين
حازم: سيرين؟ اسم غريب
سيرين بمراره: الدنيا كلها غريبه
تقاطعه دكتوره جيهان حيت تدخل الغرفه على غفله
جيهان: معقول يا دكتور لسه ماروحتش؟
حازم: حبيت اطمن عليها
جيهان: هاه عامله ايه دلوقتى حاسه بوجع؟
سيرين: ااه شويه بس بسيط فى جنبى اكتر حاجه
جيهان: اسمك ايه بأه؟
