رواية هاتولي عريس بقلم نورهان محمد
عواطف : تقصدى اللى اسمه حسين ده ماله
جميله : لغى الموضوع كله
عواطف : لالالا دى عاوزلها قاعده وكوبايه شاى وتفهمينى بشويش كده ايه اللى حصل
جميله : طيب روحى اعملى الشاى واعمليلى قهوتى لحد ما اروح اغير هدومى واجيلك
*************************************************
شادى يدخل لمامته فى اوضتها يلاقيها معاها مكالمه وبتتكلم بصوت واطى وبعد شويه قفلت الموبايل
شادى : كنتى بتكلمى مين
انشراح : مش مهم تعرف دلوقتى ها ايه الاخبار
شادى : كله فى السليم جبتلها شكولاته وفضلت ارغى معاها وخلتها كمان تصدق انى طلعت فكرت جوازى منها دى خاااالص
انشراح : اهو انت كده طلعت ابنى حبيبى
شادى : ايدك طيب على فلوس
انشراح : ما انت لسه واخد شادى لحقت تصرفهم
شادى : اعمل ايه يعنى منا حظى الايام دى فى النازل
انشراح : بكره ولا بعده هبقى اتصرفلك
شادى : بكره ولا بعده ايه انا عاوزه
دلوقتى
انشراح : وانا هجبلك منين وكمان احنا مش اتفقنا مفيش سهر
شادى : مش هتنيل واسهر انا هروح بس كده شويه وهرجع بدرى
انشراح : مفيش فلوس واتفضل بقى على اوضتك عشان تنام وتصحى فايق لشغلك
شادى : مااشى يا ماما ماااااااشى …. يفتح الباب ويرزعه وراه بالجامد
انشراح : انا هلاقيها منين ولا منين بس
*************************************************
ونلاقيهم قاعدين تحت فى الحديقه وكان واضح على وجه عواطف بانها زعلانه من اللى حصل لجميله والغاء ما كانت نفسها يتحقق بانها تتجوز بالتمثيل عشان تقنع والدها بانه يطمن عليها لانها هتكون فى ايد امينه وساعتها هيوافق يجرى العمليه القلبيه
عواطف : بصراحه قلبى وجعنى
جميله : سلامه قلبك يا داده … قوليلى اعمل ايه
عواطف : ما تزعليش منى انتى برده غلطانه فى موضوع حسين
جميله : غلطت فى ايه بقى ما كل حاجه كانت قصاد عينك
عواطف : بصى انا مع الحق اه مش نازلى من زور بس الراجل عداه العيب وقف معاكى ووافق انه يعمل التمثليه دى معاكى فى الاخر تكلميه بالطريقه دى لا برده ما تنسيش انه راجل مهما كاااان
جميله : مهو اللى ابتدا يا داده لما ادخل فى خصوصياتى
عواطف : هو ممكن يكون قصده انه يعرف مش يدخل هنا تفرق
جميله : اهو بقى اللى حصل حصل
عواطف : طيب والحل دلوقتى ايه هنعمل ايه وهنقول ايه للباشا لما يعرف
جميله : مش عارفه يا داده انا خلاص ما بقتش قادره افكر
